The story of Deintree Rainforest, Queensland, Australia

SBS Radio Tamil -இல் இக்கதையைக் கேட்க......கீழ்க்கண்ட நீல நிற இணைப்பைச் சொடுக்கவும்.

Click this blue button to hear the story from SBS Tamil, Australia Radio

உலகத்திலேயே மிகப் பழமையான மழைக்காடு

ஆமசான் மழைக்காடு உலகத்தில் பெரிய மழைக்காடு. ஆனால் அது 55 மில்லியன் (5.5 கோடி) வருடங்கள் பழமையானது தான். ஆனால் ஆஸ்திரேலியாவின் டெயின்ட்ரீ மழைக்காடு ஆமசான் மழைக்காட்டை விட சிறியதாக இருந்தாலும், இதன் தோற்றம் 180 மில்லியன் ஆண்டுகள் பழமையானது.

அது கோண்ட்வானா (Gondwana) என்ற பண்டைய மாபெரும் கண்டத்துடன் தொடர்புடையது.

சுமார் 200 மில்லியன் ஆண்டுகளுக்கு முன்பு, ஆஸ்திரேலியா கோண்ட்வானாவின் ஒரு பகுதியாக இருந்தது. அது இன்றைய ஆப்பிரிக்கா, தென் அமெரிக்கா, அண்டார்டிகா, மற்றும் இந்தியாவை உள்ளடக்கியது. டெயின்ட்ரீ மழைக்காடு இந்த காலகட்டத்தில் தான் உருவாகத் தொடங்கியது, மேலும் இதன் தாவரங்கள் பண்டைய கோண்ட்வானாவின் தாவர இனங்களின் நேரடி வழித்தோன்றல்களாக உள்ளன.

கோண்ட்வானா பிரிந்தபோது, ஆஸ்திரேலியா வடக்கு நோக்கி நகர்ந்து, வெப்பமண்டல காலநிலையை அடைந்தது. டெயின்ட்ரீ மழைக்காடு, இந்த மாற்றங்களைத் தாங்கி, அதன் தனித்துவமான சூழலியலை பராமரித்தது.

டெயின்ட்ரீ மழைக்காடு எங்கு உள்ளது?

அப்படிப்பட்ட டெயின்ட்ரீ மழைக்காடு எங்கு உள்ளது? அது ஆஸ்திரேலியாவின் குயின்ஸ்லாந்து மாநிலத்தில், கெய்ர்ன்ஸ் (Cairns) மற்றும் போர்ட் டக்ளஸ் (Port Douglas) பகுதிகளுக்கு வடக்கே அமைந்துள்ளது. இது உலகின் மிகப் பழமையான மழைக்காடாகக் கருதப்படுகிறது.

டெயின்ட்ரீ மழைக்காட்டில் என்னென்ன உயிரினங்கள் இருக்கின்றன?

டெயின்ட்ரீயில் உள்ள Idiospermum australiense (ரிப்பன் உட்) மற்றும் Cycads போன்ற தாவரங்கள் 100 மில்லியன் ஆண்டுகளுக்கு முன்பு இருந்தவை. இவை "ஜூராசிக் பார்க்" தாவரங்கள் என அழைக்கப்படுகின்றன, ஏனெனில் இவை டைனோசர்கள் வாழ்ந்த காலத்தில் இருந்தவை.

மழைக்காட்டில் 3,000க்கும் மேற்பட்ட தாவர இனங்கள் உள்ளன, இதில் 700க்கும் மேற்பட்டவை டெயின்ட்ரீக்கு மட்டுமே உரியவை (endemic). இவற்றில் பல தாவரங்கள் 100 மில்லியன் ஆண்டுகளுக்கு மேலாக மாறாமல் உள்ளன.

இங்கு 430 பறவை இனங்கள், 70 ஊர்வன இனங்கள், 90 பட்டாம்பூச்சி இனங்கள், மற்றும் 12,000 பூச்சி இனங்கள் உள்ளன. Cassowary (காசோவரி) என்ற அரிய பறவை, இந்த மழைக்காட்டின் சின்னமாகக் கருதப்படுகிறது. இது விதைகளைப் பரப்புவதில் முக்கிய பங்கு வகிக்கிறது.

இங்கு உள்ள 30% தவளைகள், 65% பட்டாம்பூச்சிகள், மற்றும் 20% பறவைகள் ஆஸ்திரேலியாவுக்கு மட்டுமே உரியவை. மழைக்காட்டில் ஆண்டுக்கு 3,000 மி.மீ மழை பெய்கிறது, இது அதன் பசுமையான தன்மைக்கு காரணம். டெயின்ட்ரீயில் உள்ள Fan Palm மரங்கள், 50 அடி உயரம் வரை வளரக்கூடியவை, மேலும் மழைக்காட்டின் தனித்துவமான அம்சமாகும்.

எப்பொழுது வெளி உலகுக்கு வந்தது?

1770இல், கேப்டன் ஜேம்ஸ் குக் (Captain James Cook) குயின்ஸ்லாந்துஊழவு கடற்கரையை ஆய்வு செய்தார், ஆனால் டெயின்ட்ரீயை உள்ளே சென்று ஆய்வு செய்யவில்லை. அவரது கப்பல், கிரேட் பேரியர் ரீஃப்பில் மோதியதால், இப்பகுதி "Cape Tribulation" (துன்ப முனை) என பெயரிடப்பட்டது.

1870களில், ஜார்ஜ் எல்ஃபின்ஸ்டோன் டால்ரிம்பிள் (George Elphinstone Dalrymple) என்ற ஆய்வாளர் டெயின்ட்ரீ ஆற்றை ஆய்வு செய்தார். இந்த டால்ரிம்பிள் தான் இதற்கு டெயின்ட்ரீ மழைக்காடு என்று பெயர் வைத்தார். ஏன் தெரியுமா? அப்பொழுது Richard Daintree என்கிற புவியியலாளர் குயின்ஸ்லாந்து மாநிலத்தின் ஏஜென்ட் ஜெனரலாக இருந்தார். அதனால் அவரைக் கௌரவப் படுத்தும் வண்ணம் அந்த மழைக்காட்டிற்கு டெயின்ட்ரீ மழைக்காடு என்று பெயர் வைத்தார்.

மழைக்காட்டின் அழிப்பு

19ஆம் நூற்றாண்டின் பிற்பகுதியில், ஐரோப்பிய குடியேறிகள் மரம் வெட்டுதல், சுரங்கம், மற்றும் விவசாயத்திற்காக மழைக்காட்டின் பகுதிகளை அழித்தனர். சர்க்கரைக்கரும்பு தோட்டங்கள் மற்றும் கால்நடை பண்ணைகள் இதற்கு முக்கிய காரணங்களாக இருந்தன.

டெயின்ட்ரீ தேசிய பூங்கா

20ஆம் நூற்றாண்டின் தொடக்கத்தில், விஞ்ஞானிகள் டெயின்ட்ரீயின் தனித்துவமான பல்லுயிர் பன்முகத்தன்மையை உணர்ந்தனர். இது பரிணாம ஆய்வுக்கு முக்கிய இடமாக மாறியது. டெயின்ட்ரீ தேசிய பூங்கா 1967இல் நிறுவப்பட்டது, இது மழைக்காட்டின் பாதுகாப்பை உறுதி செய்கிறது.

1988இல், டெயின்ட்ரீ உள்ளிட்ட குயின்ஸ்லாந்தின் வெப்பமண்டல மழைக்காடுகள் (Wet Tropics of Queensland) UNESCO உலக பாரம்பரிய தளமாக அறிவிக்கப்பட்டது. இது 900,000 ஹெக்டேர் பரப்பளவைக் கொண்டது, இதில் டெயின்ட்ரீ ஒரு முக்கிய பகுதியாகும். டெயின்ட்ரீ மழைக்காடு, உலகின் மற்றொரு UNESCO தளமான கிரேட் பேரியர் ரீஃப் (Great Barrier Reef) உடன் இணைந்து, (Where the Rainforest Meets the Reef) என்று அழைக்கப்படுகிறது. இந்த இரண்டு சூழலியல்களும் ஒரே இடத்தில் சந்திப்பது உலகில் வேறெங்கும் இல்லாத தனித்துவமான அம்சமாகும்.

எந்த பூர்வீகக்குடி மக்கள் இங்கு வாழ்ந்து வந்தார்கள்?

டெயின்ட்ரீ மழைக்காடு, குகு யாலஞ்சி (Kuku Yalanji) பழங்குடி மக்களின் பூர்வீக நிலமாகும். இவர்கள் 50,000 ஆண்டுகளுக்கு மேலாக இப்பகுதியில் வாழ்ந்து வருகின்றனர். குகு யாலஞ்சி மக்களுக்கு, டெயின்ட்ரீ ஒரு புனித இடமாகும். இவர்களின் கனவு நேரக் கதைகள் (Dreamtime stories) மழைக்காட்டின் மலைகள், ஆறுகள், மற்றும் உயிரினங்களுடன் இணைக்கப்பட்டுள்ளன. உதாரணமாக, Wujal Wujal (ஒரு அருவி) ஆன்மீக முக்கியத்துவம் வாய்ந்த இடமாகும். இவர்கள் மழைக்காட்டுடன் இணைந்து வாழ்ந்தனர். பருவமழை மற்றும் வறண்ட காலங்களுக்கு ஏற்ப தங்கள் வாழ்க்கையை மாற்றிக்கொண்டனர். இவர்களின் நிலையான வாழ்க்கை முறை, மழைக்காட்டை பாதுகாக்க உதவியது. இன்று, குகு யாலஞ்சி மக்கள் சுற்றுலாவில் பங்கேற்கின்றனர். தங்கள் கலாச்சாரத்தை பகிர்ந்து கொள்கின்றனர். Mossman Gorge Centre மற்றும் Walkabout Cultural Adventures போன்றவை இவர்களின் வழிகாட்டுதலுடன் நடத்தப்படுகின்றன.

பயணக் குறிப்புகள் யாவை?

என்னென்ன பார்க்கலாம்?  கேப் டிரிபுலேஷன் (Cape Tribulation) - மழைக்காடு மற்றும் கிரேட் பேரியர் ரீஃப் சந்திக்கும் இடம். அழகிய கடற்கரைகள் மற்றும் ஹைக்கிங் பாதைகள் உள்ளன.

மாஸ்மன் கோர்ஜ் (Mossman Gorge) படிகார நீரோடைகள், தெளிவான நீரில் நீந்துதல் மற்றும் பழங்குடி கலாச்சார சுற்றுப்பயணங்கள் (Dreamtime Walks) ஆகியவைகளைச் செய்யலாம்.

டெயின்ட்ரீ ரிவர் குரூயிஸ் (Daintree River Cruise)   முதலைகள் மற்றும் அரிய பறவைகளை நீரோடையில் பார்க்கலாம். எமரால்டு கிரீக் (Emerald Creek Falls) அழகான அருவி மற்றும் நீர்த்தடங்கள். நீச்சல் மற்றும் பிக்னிக்கிற்கு ஏற்றது. பழங்குடி கலாச்சார அனுபவம் - கூகு யாலஞ்சி (Kuku Yalanji) பழங்குடியினரின் வரலாறு, மருத்துவ தாவரங்கள் பற்றி அறியலாம். 

வனவிலங்குகள் - காஸ்கோவரி (Cassowary - பெரிய பறவை), காட்டு பன்றிகள், அரிய பட்டாம்பூச்சிகள் மற்றும் பல்லிகள்.

பயண ஏற்பாடுகள்/எச்சரிக்கைகள்

எப்போது பார்க்கச் செல்வது: சிறந்த நேரம்: மே முதல் அக்டோபர் வரை (உலர்ந்த காலம்). வானிலை குளிர்ச்சியாகவும், மழை குறைவாகவும் இருக்கும். புலிகள், பறவைகள் போன்ற வனவிலங்குகளை எளிதாகப் பார்க்கலாம்.  தவிர்க்க வேண்டிய காலம்: டிசம்பர் - மார்ச் (ஈரமான காலம்).  அதிக மழை, ஈரப்பதம் மற்றும் கொசுக்கள் அதிகம். சில பகுதிகள் மூடப்படலாம்.

கொசுக்களிடமிருந்து தன்னைப் பாதுகாத்துக் கொள்ள பூச்சி ஒழிப்பு மருந்து (Insect Repellent) எடுத்துச் செல்லவும். 

நிறைவாக

உலகத்திலேயே 13-18 கோடி வருடங்கள் பழமையான, ஆமசான் மழைக்காட்டை விட பழமையான மழைக்காட்டில் பயணம் செய்கிறீர்கள் என்பதை மறந்து விட வேண்டாம்.

******